Şoyqudan Paşinyana ittiham: Basqın siyasəti!

Rusiya Təhlükəsizlik Şurasının katibi Sergey Şoyqu, Ermənistanın Rusiyanın ölkədəki milyardlarla dollar sərmayə yatırdığı müəssisələri basqın yolu ilə ələ keçirməyə çalışdığını bildirib. O, Rusiyanın 1990-cı illərdə Ermənistanı iqtisadi və enerji böhranından xilas etdiyini və Avrasiya İqtisadi Birliyinə üzvlüyün on ili ərzində ölkə iqtisadiyyatının üç dəfə böyüdüyünü vurğulayıb.

Minval.info xəbər verir ki, Sergey Şoyqu, Nikol Paşinyan hökumətinin Rusiya ilə əlaqələri kəsmək və Qərblə əməkdaşlığı gücləndirmək siyasəti yürüdüyünü qeyd edib. O, Ermənistanda fəaliyyət göstərən Rusiya biznesinə qarşı qeyri-dost münasibət və açıq-aşkar ikili standartların tətbiq olunduğunu bildirib. Şoyqu, Rusiyanın milyardlarla sərmayə yatırdığı müəssisələr və bütöv sahələrlə bağlı baş verənləri “basqın yolu ilə ələ keçirmə” adlandırıb.

Rusiya Təhlükəsizlik Şurasının katibi, İrəvanın “açıq-aşkar absurd” arqumentlər irəli sürdüyünü də əlavə edib. Məsələn, Rusiyanın Ermənistan dəmir yollarındakı idarəçiliyinin davam etdirilməsi halında Ermənistanın beynəlxalq dəmir yolu şəbəkələrinə inteqrasiya imkanını itirməsi kimi arqumentlər irəli sürüldüyünü bildirib.