VACİBRusiyadan Azərbaycana pul köçürmələri dayandırıldı

Rusiya ilə Azərbaycan arasında geniş istifadə olunan pulköçürmə xidmətlərindən birində məhdudiyyət yaranıb.

Minval.info xəbər verir ki, “Zolotaya Korona” sistemi vasitəsilə Rusiyadan Azərbaycana, eləcə də Qazaxıstan və Gürcüstana onlayn pul köçürmələri hazırda mümkün deyil.

Məlumata görə, sistem üzərindən köçürmələr yalnız Qırğızıstan, Türkiyə və Özbəkistan istiqamətində aktiv olaraq qalır.

Azərbaycanda fəaliyyət göstərən Unibank və Yelo Bank bildiriblər ki, “Zolotaya Korona” ödəniş sistemini dəstəkləsələr də, xidmətin fəaliyyətində yaranmış qlobal problemlər səbəbindən Azərbaycandan Rusiyaya pul göndərilməsi də müvəqqəti dayandırılıb.

Bununla yanaşı, VTB Azərbaycan qeyd edib ki, bank ümumiyyətlə “Zolotaya Korona” ödəniş sistemi vasitəsilə köçürmə əməliyyatları həyata keçirmir.

Məhdudiyyətin hansı səbəbdən yarandığı və xidmətin nə vaxt bərpa olunacağı ilə bağlı hələlik rəsmi açıqlama verilməyib.