Qarabağda dini irsin bərpası sürətlənir

Azərbaycan Memarlıq və İnşaat Universitetinin rektoru, professor, Əməkdar memar Gülçöhrə Məmmədova, dini irsin qorunması istiqamətində genişmiqyaslı işlərin aparıldığını bildirib. O, işğaldan azad edilmiş Qarabağ və Şərqi Zəngəzur ərazilərinə xüsusi diqqət yetirildiyini vurğulayıb.

Minval.info xəbər verir ki, Gülçöhrə Məmmədova bu fikirləri Mədəniyyət Nazirliyi və Dini Qurumlarla İş üzrə Dövlət Komitəsinin təşkilatçılığı ilə keçirilən “Tarixi-dini abidələrin mühafizəsi: çağırışlar və perspektivlər” konfransında səsləndirib. O, Şuşada bərpa edilmiş məscidlər və Ağdam Cümə məscidini nümunə olaraq göstərib və bu istiqamətdə işlərin davam etdirilməsinin vacibliyini qeyd edib.

Gülçöhrə Məmmədova bildirib ki, ölkəmizdə yüzlərlə dağıdılmış məscid mövcuddur və onların bərpası ilə yanaşı, digər dini abidələrin də qorunması üçün tədbirlər görülməlidir. Mədəniyyət Nazirliyi bu obyektləri müəyyənləşdirərək dövlət tərəfindən qorunan irs obyektlərinin siyahısına daxil edir.