Qanuni oğru’ ifadəsi həbs səbəbi deyil

Qanuni oğru' ifadəsi həbs səbəbi deyil

Azərbaycanda ‘qanuni oğru’ ifadəsini işlədən şəxslərin həbs ediləcəyi ilə bağlı sosial şəbəkələrdə yayılan iddialar hüquqi baxımdan doğru deyil. Hüquqşünas Ellada Bayramova bildirib ki, bu ifadəni işlətmək cinayət hesab olunmur və buna görə 8 ildən 15 ilədək həbs cəzası nəzərdə tutulmayıb.

Minval.info xəbər verir ki, Azərbaycan qanunvericiliyində məsuliyyət ifadənin özünə deyil, şəxsin konkret fəaliyyətinə və törətdiyi əmələ görə müəyyən edilir. Əgər şəxs kriminal qruplaşmanın yaradılmasında, idarə edilməsində və ya fəaliyyətində iştirak edirsə, yaxud bu statusdan istifadə edərək başqa cinayət əməlləri törədirsə, həmin əməllərə uyğun olaraq cinayət məsuliyyəti yarana bilər.

Hüquqşünasın sözlərinə görə, sadəcə hansısa şəxsin özünü ‘qanuni oğru’ adlandırması avtomatik olaraq onun həbs ediləcəyi anlamına gəlmir. 8 ildən 15 ilədək həbs məsələsi isə yalnız konkret cinayət tərkibi və qanunda həmin əməl üçün nəzərdə tutulan cəza ilə bağlı ola bilər. Belə iddialar böyük ehtimalla Rusiya qanunvericiliyindəki kriminal iyerarxiyada yüksək mövqe tutmağa görə məsuliyyətlə qarışdırılıb.