Pirəkəşküldə zəhərli ilanlar evləri bürüdü

Abşeronun Pirəkəşkül kəndində zəhərli ilanların evlərə doluşması sakinlər arasında ciddi narahatlıq yaradıb. Kənd sakini Nailə Alıyeva, 51 yaşında, indiyədək dörd gürzə ilanını öldürmək məcburiyyətində qaldığını bildirib. Onun sözlərinə görə, xüsusilə gecə saatlarında evə daxil olan ilanlar ailə üzvlərinin rahatlığını pozur.

Minval.info xəbər verir ki, vəziyyətin təhlükəli olması səbəbindən Nailə Alıyeva və ailəsi bir müddət kənddən uzaqlaşaraq Sumqayıtda kirayə evdə yaşamaq məcburiyyətində qalıblar. Lakin maddi imkanlar kirayədə uzun müddət qalmağa imkan vermədiyindən yenidən kəndə qayıdıblar. Sakinlər bildirirlər ki, gürzələrin sayı artdıqca kənddə yaşayan insanlar daha da təşvişə düşürlər və ilanların heyvanlara da hücum edərək bəzi hallarda onları tələf etdiyi iddia olunur.

Sakinlər, xüsusilə uşaqlar və yaşlılar üçün yaranan ciddi təhlükə səbəbindən aidiyyəti qurumlardan əraziyə baxış keçirilməsini və ilanların məskunlaşdığı yerlərin müəyyən edilərək zəruri tədbirlərin görülməsini tələb edirlər.