Bu gündən etibarən Bakı Metropoliteni fəaliyyətini tamamilə dayandırıb. Nazirlər Kabineti yanında Operativ Qərargahın qərarına görə, koronavirus infeksiyasının yayılmasının qarşısını almaq üçün metro bu il aprelin 20-nə qədər bağlı olacaq.

Musavat.com xəbər verir ki, artıq metro girişlərində fəaliyyət göstərən bəzi apteklər və ticarət yerləri də fəaliyyətlərini dayandırıblar. Bu gündən etibarən bir çox metro keçidlərində bu kimi obyektlər fəaliyyət göstərmir.

“Bakı Metropoliteni” QSC-nin mətbuat xidmətinin rəhbəri Bəxtiyar Məmmədov Musavat.com-a bildirdi ki, metro keçidlərində bu kimi obyektlərin fəaliyyəti ilə bağlı tam məlumata sahib deyil: “Lakin bu gündən etibarən metro işləmir. Həmin girişlərdə fəaliyyət göstərən obyketlərə də yəqin ki, müştəri gəlmədiyi üçün qapadıblar”.

Onu da bildirək ki, Nazirlər Kabineti yanında Operativ Qərargahın qərarlarında aptektlərin fəaliyyətinin məhdudlaşdırılması nəzərdə tutulmayıb.