Gürcüstanın keçmiş baş nazirinə yeni korrupsiya ittihamı

Gürcüstanın keçmiş baş naziri İrakli Qaribaşviliyə qarşı yeni korrupsiya ittihamı irəli sürülüb. Gürcüstan Baş Prokurorluğu onu bir qrup şəxslə əvvəlcədən razılaşaraq külli miqdarda rüşvət almaqda ittiham edir.

Minval.info xəbər verir ki, baş prokurorun müavini Amiran Quluaşvili açıqlamasında keçmiş müdafiə naziri Juanşer Burçuladzenin də istintaqla əməkdaşlıq etdiyini bildirib. İstintaqın versiyasına görə, korrupsiya sxemi 2022-ci ilin sonlarında Müdafiə Nazirliyi üçün bahalı tibbi avadanlıqların məxfi satınalınması zamanı qurulub.

Prokurorluq qeyd edir ki, üç satınalma çərçivəsində real dəyəri təxminən 11,5 milyon lari olan tibbi avadanlıq və digər inventarlar Müdafiə Nazirliyinə 18,48 milyon lariyə satılıb. Bu səbəbdən dövlətə təxminən 6,98 milyon lari zərər vurulduğu iddia edilir. İstintaqın versiyasına əsasən, satınalmalar müqabilində ümumilikdə 1,9 milyon lari qeyri-qanuni ödəniş verilib. Bunun 1,5 milyon larisi keçmiş müdafiə naziri Juanşer Burçuladzeyə çatıb. Prokurorluğun iddiasına görə, Burçuladze həmin vəsaitin 750 min larisini özündə saxlayıb, digər 750 min larini isə İrakli Qaribaşviliyə rüşvət kimi verib.

ƏLAQƏLİ

Bunu da oxu

Azərbaycanlı təqsirləndirilən şəxs Rusiyadan ekstradisiya edilir

24.08.2026 - 20:30

İrakli Qaribaşviliyə Gürcüstan Cinayət Məcəlləsinin dövlət-siyasi vəzifə tutan şəxsin qrup halında xüsusilə külli miqdarda rüşvət almasını nəzərdə tutan maddələri ilə ittiham irəli sürülüb. Bu maddələr üzrə onu 11 ildən 15 ilədək həbs cəzası gözləyir. Qeyd edək ki, İrakli Qaribaşvili artıq başqa cinayət işi üzrə həbsdədir və qanunsuz gəlirlərin leqallaşdırılması ilə bağlı əvvəlki iş üzrə 5 il müddətinə azadlıqdan məhrum edilib. Yeni ittihamla bağlı prokurorluq məhkəməyə ilkin dinləmənin təyin edilməsi üçün müraciət edəcək.