Elçin Əlibəyliyə qəribə qadağa: "Çünki kiminsə qohumu deyiləm..."

“Həqiqətən, harada doğulmağı insan həyatına təsir edir. Mənim doğum yerimi bilən kimi nə AMEA-ya, nə Mədəniyyət və İncəsənət Universitetinə, nə də digər ali məktəblərin jurnalistika fakültələrinə yaxın buraxmırlar”.

Minval.info xəbər verir ki, bu sözləri telejurnalist Elçin Əlibəyli qeyd edib.

Telejurnalistin sözlərinə görə, onun müəllifi olduğu dörd kitabdan dərs keçirlər: “Məqalələrimi magistr dissertasiyasına (bəzən də fəlsəfə doktoru) çevirib plagiatlıq da edirlər. Amma məni auditoriyaya buraxmırlar”.

E.Əlibəyli bildirib ki, 2005-ci ildən fəlsəfə doktorudur, 2011-ci ildən doktorluq dissertasiyası qoltuğunda gəzir, 44 elmi məqalənin müəllifidir: “Amma universitetlərdə bakalavr dərəcəsində olanlar dərs deyirlər. Hətta rektorla görüşüb vakansiya yerə öz namizədliyimi təqdim etdim. Cavab isə müəmmalı baxışlar oldu. Çünki, kiminsə qohumu, həmyerlisi deyiləm. Bax belə”.

Qeyd edək ki, Elçin Əlibəyli 5 dekabr 1978-ci ildə İrəvan şəhərində doğulub.

Minval.info