Diş çürüməsinə qarşı bir dəqiqəlik həll

ABŞ-də aparılan genişmiqyaslı tədqiqatda diş çürüyünün inkişafını əhəmiyyətli dərəcədə yavaşladan yeni bir metod aşkar edilib. Miçiqan Universitetinin tədqiqatçıları tərəfindən həyata keçirilən bu araşdırmada 6 yaşdan kiçik 830 uşaq iştirak edib. Onların çürük dişlərinə ‘gümüş diamin flüorid’ adlı məhlul tətbiq olunub.

Minval.info xəbər verir ki, tədqiqat nəticələrinə əsasən, məhlul tətbiq edilən uşaqların təxminən 50 faizində çürük irəliləməyib. Müqayisə üçün, ‘plasebo’ qrupunda bu göstərici yalnız 17 faiz təşkil edib. Tədqiqatçılar bildirirlər ki, təxminən bir dəqiqə davam edən bu ağrısız prosedur, xüsusilə kiçik uşaqlarda dolğu və daha geniş diş müalicələrinə ehtiyacı azalda bilər.

Lakin bu metodun əsas mənfi tərəfi, çürümüş diş toxumasının qara və ya tünd qəhvəyi rəngə çevrilməsidir. Bu səbəbdən, valideynlər və diş həkimləri bu üsulun istifadəsi zamanı diqqətli olmalıdırlar.