Borcu olanlar istiliksiz qalacaq

Azərbaycanda istilik haqlarını ödəməyən binalara istiliyin verilməsi mümkün olmayacaq. Publika.az xəbər verir ki, bu barədə “Report”a “Azəristiliktəchizat” ASC-dən məlumat verilib.

Bildirilib ki, builki istilik mövsümündə 178 minə yaxın mənzilin istiliklə təmin edilməsi nəzərdə tutulur. Səhmdar cəmiyyəti xidmət haqqını vaxtında ödəyən abonentlərinə təşəkkür edir və bildirir ki, istehlakçıların böyük əksəriyyətinin müntəzəm ödənişləri xidmət göstərilən ərazilərdə təmir və texniki sazlama işlərinin vaxtında aparılmasına, istilik təchizatının etibarlılığına mühüm töhfə verir.

Qeyd edilib ki, bəzi ərazilərdə, xüsusilə məcburi köçkünlər üçün inşa edilmiş yaşayış komplekslərində ödənişdən kütləvi yayınma halları müşahidə olunur. Məsələn, Ağcabədi rayonunda istehlak edilmiş xidmətdən cəmi 17,5 %, Tərtər rayonunda 24,6 %, Bərdə rayonunda 29,5 %, Goranboy rayonunda 46 %, Sabunçu rayonu Ramana qəsəbəsində 33,4 %, Sumqayıt şəhərində isə 41,6 % ödəniş edilib.

ƏLAQƏLİ

Bunu da oxu

Azərbaycanda növbəti istilik mövsümünə hazırlıqlar tamamlanır

14.11.2026 - 11:54

Bu vəziyyət həmin ərazilərdə zəruri təmir və texniki xidmət işlərinin vaxtında maliyyələşdirilməsini çətinləşdirir və hətta mümkünsüz edir. Binalar arasında istilik-mühəndis infrastrukturu ortaq olduğundan, bu işlərin gecikməsi ödənişlərini vaxtında edən sakinlərin də xidmət keyfiyyətinə təsir göstərə bilər.

Qurum bütün abonentlərin borclarını ödəməyə və cari ödənişləri vaxtında etməyə çağırır. Hər bir istehlakçının ödəniş intizamı həm öz mənzilinin, həm də qonşularının dayanıqlı istilik təminatı üçün əhəmiyyətlidir.