Belqorodda sərnişin avtobusu atəşə tutuldu – 19 yaralı var

Rusiyanın Belqorod vilayətində sərnişin avtobusuna hücum nəticəsində azı 19 nəfər xəsarət alıb. Minval.info xəbər verir ki, bu barədə vilayətin rəhbər vəzifəsini icra edən şəxs məlumat yayıb.

İddiaya görə, hücum Şebekino şəhərində baş verib. Məlumata əsasən, yaralananlardan altısının vəziyyəti ağır qiymətləndirilir.

Bildirilir ki, hücum nəticəsində sərnişin avtobusu, yük avtomobili və minik maşını zədələnib. Minik avtomobilinin qəlpələrdən ciddi zərər gördüyü qeyd olunur.

Rusiya tərəfi hücuma görə Ukrayna Silahlı Qüvvələrini məsuliyyət daşıdığını iddia edir. Ukrayna tərəfindən isə hadisə ilə bağlı hələlik rəsmi açıqlama verilməyib.