Bakı və Sumqayıtda yaşıllıqlara ciddi ziyan vuruldu

Bakı və Sumqayıt şəhərlərində yaşıllıqlara 40 min manata yaxın ziyan vurulub. Dövlət Ekoloji Təhlükəsizlik Xidmətinin əməkdaşları tərəfindən son bir həftə ərzində keçirilən nəzarət tədbirləri zamanı bu şəhərlərdə yaşıllıqların qanunsuz kəsilməsi faktları aşkar edilib.

Minval.info xəbər verir ki, araşdırma nəticəsində Bakı şəhəri, Nizami rayonu Kamil Balakişiyev, Mehdi Abbasov və Nəsimi küçələrinin kəsişməsində, eləcə də Sumqayıt şəhəri 4-cü məhəllə ərazisində ağacların qanunsuz kəsilməsi nəticəsində yaşıllıqlara 39 480 manat məbləğində ziyan dəydiyi müəyyən olunub. Hər bir fakt üzrə yaşıllıqlara dəymiş ziyanın məbləği cinayət tərkibi yaratdığından, məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.