19 yaşlı azərbaycanlı aktyor – Timur Zaur oğlu Əkbərov özünü Rusiyanın məşhur balet artisti, Xalq artisti Nikolay Tsiskaridzenin oğlu adlandırır.  

“Qafqazinfo”nun “Komsomolskaya pravda”ya istinadən məlumatına görə, Timur məşhur rəqqasın oğlu olduğunu sübut etmək üçün DNT analizi verməyə də hazır olduğunu açıqlayıb.

“Sən məni niyə atdın? Niyə? Səninlə görüşdükdə ən əsas sualıma cavab eşitmək istəyirəm! Mən ağlayıram, daha belə yaşaya bilmirəm”, – 19 yaşlı Timur deyib.

Nikolay Tsiskaridze və Timur Əkbərov

Gənc oğlan Tsiskaridze ilə doğmalıq əlaqəsini sübut etməkdə qətiyyətlidir: “Sən çox yaxşı bilirdin və bilirsən ki, sənin oğlun var! Bəli, mən səndən çox incimişəm, amma bütün bunlara baxmayaraq, çox şadam ki, atam var”.

“Mən kasıb azərbaycanlı ailəsində doğulmuşam. Anam varlı evlərdə özgə uşaqlara dayəlik edir və kottec sahiblərinə təsərrüfat işlərində kömək edir. Uşaqlıqdan valideyn sevgisinin nə olduğunu bilməmişəm – anam mənə soyuq yanaşır, atam isə hətta doğulduğum haqda bilmir”, – Timur bildirib.

Nikolay Tsiskaridze

Gənc oğlanın sözlərinə görə, Nikolay Tsiskaridze onun anası ilə sonuncunun artistin evində teatr kostyumlarını ütüləyərkən tanış olub. Onların arasında hisslər oyanıb, sevgi münasibətlərinin nəticəsi isə balaca Timurun dünyaya gəlməsi olub.

Məsələ ilə bağlı “Komsolomolskaya pravda”nın əməkdaşları Tsiskaridzenin köməkçisi ilə əlaqə saxlayıb. O, zəngin səbəbini öyrəndikdən sonra bir xeyli gülüb. Xalq artisti isə danışmaqdan imtina edib və lakonik cavab verib: “Yox!”.