“Avrora” şirkəti cərimələnib

Maliyyə Bazarlarına Nəzarət Palatası “Avrora” Məhdud Məsuliyyətli Cəmiyyətini cərimələyib.

“Report”un xəbərinə görə, şirkət İnzibati Xətalar Məcəlləsinin (İXM) 430.4-cü maddəsi ilə təqsirli bilinib.

İXM-in 430.4-cü maddəsi avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə məsuliyyət nəzərdə tutur. Bu inzibati xətaya görə, hüquqi şəxslər inzibati xətanın bilavasitə obyekti olmuş valyuta vəsaitinin iyirmi faizindən otuz faizinədək məbləğdə cərimə edilir.

Binəqədi Rayon Məhkəməsinin qərarından verilən şikayətə Bakı Apelyasiya Məhkəməsində baxılır.

1994-cü ildə yaradılan “Avrora” şirkəti yerli və xarici istehsalçıların istehlak mallarının distribyutoru kimi fəaliyyət göstərir. Şirkətin portfoliosuna “Danone”, “Ehrman”, “Rolton”, “Hochland”, “Chivas”, “Glenfiddich” kimi şirkətlər daxildir.