Aran bölgəsində jurnalistlər üçün yeni əməkdaşlıq imkanları: AJB-dən mühüm görüş
Azərbaycan Jurnalistlər Birliyi (AJB) Aran bölgəsində fəaliyyət göstərən jurnalistlərlə zona müşavirəsi təşkil edib. Bu mühüm tədbir 1 avqust 2026-cı il tarixində Mingəçevir Gənclər Evində keçirilib və EL TV tərəfindən təşkil olunub.
Minval.info xəbər verir ki, müşavirədə AJB-nin sədri, Əməkdar jurnalist Elçin Şıxlı, AJB-nin İşçi Qrupunun üzvləri, bölgədə fəaliyyət göstərən jurnalistlər, media rəhbərləri, televiziya, xəbər saytları və sosial media platformalarının nümayəndələri iştirak ediblər. Aran bölgəsindən 30-dan çox jurnalist tədbirə qatılıb.
Müşavirədə AJB-nin yenilənmə prosesi, bölgə mediasının mövcud vəziyyəti, jurnalistlərin peşə fəaliyyəti ilə bağlı ehtiyacları və gələcək əməkdaşlıq imkanları geniş müzakirə olunub. Çıxış edənlər bölgə mediasının üzləşdiyi problemlərdən bəhs edib, AJB-nin gələcək fəaliyyəti ilə bağlı təkliflərini səsləndiriblər.
Görüşdə çağdaş jurnalistikanın qarşısında duran yeni çağırışlar da diqqət mərkəzində olub. Süni intellektdən istifadənin imkanları, sosial media mühiti, vətəndaş jurnalistikası, dezinformasiya ilə mübarizə, reklam bazarının vəziyyəti, oxucu etimadının qorunması, peşə etikası və jurnalistlərin hüquqlarının müdafiəsi əsas müzakirə mövzularından olub.
Əlavə olaraq, dövlətin informasiya təhlükəsizliyinin qorunmasının əhəmiyyəti xüsusi vurğulanıb. Qeyd olunub ki, müasir dövrdə informasiya təhlükəsizliyi təkcə texniki məsələ deyil, eyni zamanda cəmiyyətin etibarlı informasiya ilə təmin edilməsi, milli maraqların qorunması və peşəkar medianın gücləndirilməsi ilə sıx bağlıdır.
Çıxışlarda jurnalistlər arasında peşə həmrəyliyinin möhkəmləndirilməsi, bilik və təcrübə mübadiləsinin genişləndirilməsi, bölgə mediasının daha fəal tanıdılması, eləcə də AJB ilə yerli jurnalistlər arasında davamlı əməkdaşlıq mexanizminin yaradılması təklif olunub.
Vurğulanıb ki, Azərbaycan Jurnalistlər Birliyi bölgə jurnalistlərinin peşəkar inkişafına dəstək göstərmək, onların təlimlərə cəlb olunmasını təmin etmək, yeni bilik və bacarıqların paylaşılmasına şərait yaratmaq, həmçinin Aran bölgəsi mediasının ölkənin ümumi media məkanında daha geniş təmsil olunmasına dəstək vermək istiqamətində fəaliyyətini davam etdirəcək.
Tədbirin sonunda Azərbaycan Jurnalistlər Birliyi ilə bölgə mediası arasında daha sıx, səmərəli və davamlı əməkdaşlıq əlaqələrinin qurulmasının vacibliyi bir daha vurğulanıb.
Ən son xəbərləri bizim sosial media səhifələrimizdə izləyin!
Ölkədən və dünyadan ən sürətli canlı yayımları qaçırmamaq üçün bizə abunə olun:
OXŞAR XƏBƏRLƏR
Lökbatan sakinləri su dərdində: Yay istisində gündüzlər nə edək?
Bakıda bina sakinlərinin narahatlığı: Metro keçidi təhlükə yaradır?
Daş karxanalarının köhnə mişarları Bakının havasını niyə zəhərləyir?
