Ana qolları olmayan körpəsindən imtina etdi

Sabunçu rayonunda bir ana doğuşdan sonra qolları olmayan körpəsindən rəsmi şəkildə imtina edib. Hadisə ilə bağlı ətraflı məlumatlar açıqlanıb.

Minval.info xəbər verir ki, TƏBİB-in məlumatına görə, 1985-ci il təvəllüdlü hamilə qadın avqustun 27-də təcili tibbi yardım briqadası tərəfindən Sabunçu Tibb Mərkəzinə çatdırılıb. Hamiləliyinin 36-cı həftəsində olan qadına doğuşun birinci dövrü və dölyanı mayenin vaxtından əvvəl axması diaqnozları qoyulub və ona zəruri tibbi xidmətlər göstərilib. Qeysəriyyə əməliyyatı nəticəsində cinsi oğlan, boyu 47 sm, çəkisi 2 kq 600 qr olan uşaq dünyaya gəlib. Körpə çoxsaylı inkişaf qüsurları ilə doğulub.

Avqustun 30-da ana yazılı iltizamnamə ilə övladından imtina edərək tibb müəssisəsini tərk edib. Bu barədə hüquq-mühafizə orqanlarına dərhal məlumat verilib. Körpə tibb müəssisəsində olduğu müddət ərzində zəruri tibbi xidmətlər alıb və müvafiq tibbi nəzarət altında saxlanılıb. Nəhayət, 10 sentyabr 2026-cı il tarixində körpə Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinin nümayəndələrinə təhvil verilib.