Almaniyada sürücüsüz yük maşını dövrü başladı

Almaniyada ilk dəfə sürücüsüz və tam avtonom yük maşını real yollarda məhsul daşınmasına başlayıb. Bu yenilik İsveçin “Einride” şirkəti və “Lidl” supermarket şəbəkəsi tərəfindən həyata keçirilir. Yük maşını 4-cü səviyyə avtonom idarəetmə texnologiyasına malikdir və nəqliyyat vasitəsində sürücü və ya təhlükəsizlik operatoru yoxdur.

Minval.info xəbər verir ki, bu yük maşını “Lidl”in logistika mərkəzi ilə mağaza arasında məhsul daşıyır. Almaniyanın Federal Motorlu Nəqliyyat İdarəsi tərəfindən verilən xüsusi icazə ilə yollara buraxılan bu nəqliyyat vasitəsi, avtonom texnologiyanın gələcəkdə genişlənməsi üçün əhəmiyyətli bir addım hesab olunur.

Şirkətlər bu layihəni daha da genişləndirərək bir neçə dayanacağı əhatə edən çatdırılma şəbəkəsi yaratmağı planlaşdırır. Bu, avtonom nəqliyyatın gələcəkdə daha geniş miqyasda tətbiq olunmasına imkan verəcək.