Almaniya səfiri İran XİN-ə çağırıldı

İran Xarici İşlər Nazirliyi Almaniyanın Tehrandakı səfiri Aksel Vilhelm Ditmanı nazirliyə çağırıb. Bu addım, Almaniya rəsmilərinin İranın daxili işlərinə müdaxilə etməsi və “qəbuledilməz bəyanatlar” verməsi ilə əlaqədar atılıb.

Minval.info xəbər verir ki, rəsmi etirazı səfirə İran XİN rəhbərinin köməkçisi və Qərbi Avropa departamentinin direktoru Əlirza Yusifi təqdim edib. Görüş zamanı İran tərəfi Almaniya kansleri Fridrix Mertsin Tehrana qarşı səsləndirdiyi əsassız iddiaları rədd edib və Berlinin regional proseslərə “əsassız yanaşmasına” qarşı kəskin etirazını bildirib.

İran tərəfi, Almaniya rəhbərliyinin hazırkı siyasətinin dərhal nəzərdən keçirilməsinin və korreksiya edilməsinin zəruriliyini vurğulayıb. Yusifi həmçinin Almaniyanın İsrailə silah və siyasi dəstəyini tənqid edib. Almaniya diplomatik missiyasının rəhbəri isə İran tərəfinin etirazını ölkəsinin hökumətinə çatdıracağını bildirib.