Alman avtomobil nəhəngləri ixtisar dalğasında: Minlərlə iş yeri təhlükədə

Almaniyanın avtomobil sənayesinin liderləri olan Volkswagen, BMW və Porsche, işçi heyətində ciddi ixtisarlara gedir. Bu qərar, Çin avtomobil istehsalçılarının dünya bazarında artan təsiri, elektromobillərə keçid və yüksələn xərclərlə əlaqədardır.

Minval.info xəbər verir ki, Volkswagen, 2030-cu ilə qədər yüzlərlə rəhbər vəzifəni ləğv etməklə yanaşı, əlavə 50 min iş yerini də ixtisar etməyi planlaşdırır. Porsche isə ofis işçiləri də daxil olmaqla, 5 min nəfəri işdən çıxarmağı nəzərdə tutub. BMW isə 2027-ci ilin sonuna qədər təxminən 8 min işçisini könüllü ayrılma proqramı çərçivəsində ixtisar etməyi hədəfləyir.

Hazırda Almaniyada işdən çıxarılan yüksək vəzifəli menecerlərin sayı açıq vakansiyalardan daha çoxdur. Mütəxəssislər bu vəziyyəti ölkənin avtomobil sənayesində son illərin ən böyük yenidənqurma proseslərindən biri kimi dəyərləndirirlər.