Sumqayıtda aliment qalmaqalı: “Pulu olsa verər” deyən icra məmurundan nazirliyə şikayət olundu

Sumqayıtda aliment qalmaqalı: "Pulu olsa verər" deyən icra məmurundan nazirliyə şikayət olundu

Sumqayıt şəhər sakini İradə Etibar qızı Şirməmmədova redaksiyamıza müraciət edərək uzun illərdir keçmiş həyat yoldaşından aliment ala bilməməsindən və icra məmurlarının fəaliyyətsizliyindən şikayətlənib.

Minval.info xəbər verir ki, Sumqayıt Şəhər Məhkəməsinin 2015-ci il tarixli qətnaməsi ilə İradə Şirməmmədova və Azad Fərhad oğlu Məmmədovun nikahı pozulub, övladlarının ananın himayəsində qalması müəyyən edilib. Məhkəmənin 2016-cı ildə çıxardığı növbəti qərarla isə A.Məmmədovun övladı üçün hər ay 100 manat məbləğində aliment ödəməsi öhdəliyi qoyulub.

Şikayətçinin sözlərinə görə, qarşı tərəf uzun müddətdir bu məbləği ödəməkdən yayınıb və nəticədə yaranmış aliment borcu artıq 3000 manata çatıb. İ.Şirməmmədova iddia edir ki, Sumqayıt şəhər İcra Şöbəsinin icra məmuru Samir Məmmədov borcun tahsil olunması üçün lazımi tədbirlər görmür və qarşı tərəfin məsuliyyətdən yayınmasına göz yumur.

Ədliyyə Nazirliyinin “Qaynar xətt”inə müraciət etdiyini bildirən vətəndaş, icra məmurunun ona “Pulu olsa verər” şəklində cavab verdiyini və bu yanaşmanın onda ciddi şübhələr doğurduğunu vurğulayıb.

Məsələ ilə bağlı Ədliyyə Nazirliyindən bildirilib ki, məhkəmə qərarına əsasən borclu Azad Məmmədovdan hər ay 100 manat alimentin tutularaq tərəfə ödənilməsi təmin edilməlidir. Ödənişlər müntəzəm xarakter daşımadığı üçün iş üzrə məcburi icra tədbirləri görülür və icra sənədi xüsusi nəzarətdə saxlanılır.