Zabitlərə müjdə: Hərbi rütbə müddəti azalır

Ali təhsil müəssisələrinin magistratura, rezidentura və doktorantura pillələrini bitirən zabitlərin hərbi rütbədə olma müddəti bir il azaldılacaq. Bu dəyişiklik Milli Məclisin Müdafiə, təhlükəsizlik və korrupsiya ilə mübarizə komitəsinin iclasında müzakirə edilən “Hərbi xidmətkeçmə haqqında” Əsasnamənin təsdiq edilməsi və “Hərbi vəzifə və hərbi xidmət haqqında” qanunlarda dəyişiklik edilməsi barədə qanun layihəsində öz əksini tapıb.

Minval.info xəbər verir ki, layihəyə əsasən, Azərbaycan Respublikası Silahlı Qüvvələrinin və digər dövlət orqanlarının sifarişi ilə ali təhsil müəssisələrinin magistratura (rezidentura) səviyyəsini müvəffəqiyyətlə bitirmiş, habelə doktoranturada (adyunkturada) təhsilini başa vuraraq müvafiq elmi dərəcə almış zabitlərin hərbi rütbədə olma müddəti, ali təhsilin hər bir səviyyəsi üzrə bir dəfə olmaqla, bir il azaldılacaq.