Yol qısaltmaq istəyi faciəyə səbəb oldu

Sentyabrın 3-də Xəzər rayonunun Şağan qəsəbəsində baş verən ağır yol-nəqliyyat hadisəsi, yollarda təhlükəsizlik qaydalarına riayət etməyin nə qədər vacib olduğunu bir daha ortaya qoydu. Daxili İşlər Nazirliyinin Baş Dövlət Yol Polisi İdarəsinin şöbə rəisi Rövşən Tağıyev bildirib ki, çoxzolaqlı yolların hər bir zolağı ayrı-ayrılıqda təhlükə mənbəyidir. Bir zolaqdakı sürücü piyadanı görsə də, digər zolaqda hərəkət edən sürücü onu vaxtında fərq etməyə bilər. Avtomobillərin arasından qəfil yola çıxmaq, yolun ortasında dayanmaq və ya geri qayıtmaq qəza riskini artırır.

Minval.info xəbər verir ki, R.Tağıyev, intensiv hərəkətin olduğu yollarda məsafəni gözlə hesablamağın aldadıcı ola biləcəyini vurğulayıb. Uzaqda görünən avtomobil qısa müddətdə piyadanın olduğu nöqtəyə çata bilər. Piyadaların hərəkət hissəsində olarkən bütün zolaqlardakı nəqliyyat vasitələrinin sürətini və məsafəsini eyni anda düzgün qiymətləndirə bilmədiklərini qeyd edib. Yolu qaçaraq keçmək təhlükəli sahədə qalma müddətini azaltmır, əksinə, vəziyyətə nəzarəti zəiflədir. Bir neçə saniyə tez qarşı tərəfə çatmaq istəyi insanı bir neçə fərqli risklə üz-üzə qoyur.

DYP rəsmisi piyadalara müraciət edərək, yol hərəkəti qaydalarına ciddi əməl etməyə çağırıb. “Bir neçə dəqiqəyə qənaət etmək üçün həyatınızı riskə atmayın. Yolun digər tərəfinə ən qısa yolla deyil, ən təhlükəsiz yolla keçin. Yaxınlıqda piyada keçidi və ya yerüstü keçid varsa, ondan istifadə etmək seçim deyil, həyatınızı qoruyan zərurətdir. Yolunuzu qısaltmağa deyil, mənzil başına sağ-salamat çatmağa çalışın”, – deyə o bildirib.