Xırdalanda sakinlərdən qanunsuz yolbənd narazılığı

Xırdalan şəhərində yerləşən Abşeron Gənclər Şəhərciyinin sakinləri ərazidə qanunsuz yolbənd quraşdırılması və yüksək məbləğdə ödənişlər tələb olunması ilə bağlı narazılıqlarını bildiriblər. Sakinlər bu maneənin həm orada yaşayanlara, həm də əraziyə gələn digər vətəndaşlara çətinlik yaratdığını qeyd edirlər. Bundan əlavə, avtomobil saxlanılması üçün tələb olunan ödənişlərin hüquqi əsasının qaranlıq qaldığı vurğulanır.

Minval.info xəbər verir ki, sakinlərdən biri, Fəqani Qəhrəmanov, bu məsələyə dair narazılığını ifadə edərək, bank girovunda olan obyektlərdən qanunsuz istifadə edildiyini iddia edir. O, Nicat Məmmədov adlı şəxsin ödənişin onun şəxsi kartına köçürülməsini tələb etdiyini və rəsmi qəbz istədikdə mənfi reaksiya ilə qarşılaşdığını bildirib. Həmçinin, ərazidə qanunsuz yolbəndin quraşdırıldığını da qeyd edib.

Fövqəladə Hallar Nazirliyindən verilən məlumata görə, Dövlət Yanğın Nəzarəti Xidmətinin əməkdaşları tərəfindən əraziyə baxış keçirilib. Araşdırma nəticəsində, Abşeron Gənclər Şəhərciyinin arxa hissəsində quraşdırılan avtomatik çəpərləmə qurğusunun yanğın təhlükəsizliyi qaydalarını pozmadığı müəyyən edilib.