Xankəndidə əmək yarmarkası: 200 vakansiya təqdim edilir

Xankəndidə növbəti əmək yarmarkası keçiriləcək. Əmək və Əhalinin Sosial Müdafiəsi Nazirliyinin tabeliyində olan Dövlət Məşğulluq Agentliyi tərəfindən təşkil edilən bu tədbir, sentyabrın 11-də saat 10:00-da Xankəndi Ticarət Mərkəzində baş tutacaq.

Minval.info xəbər verir ki, yarmarkada dövlət və özəl sektoru təmsil edən 25 müəssisə tərəfindən mühəndis, həkim, tibb bacısı, laborant, mühasib-xəzinədar, satıcı-kassir, xidmət rəisi, elektromexanik, elektrik, qaynaqçı, aşpaz, qeydiyyatçı, dərzi, satınalma mütəxəssisi, çörəkçi, anbardar, çeşidləyici, sürücü, traktorçu-mexanizator və digər peşə istiqamətləri üzrə 200-ə yaxın vakansiya təqdim olunacaq.

Vakansiyalar Xankəndi şəhəri, Şuşa, Ağdam, Ağdərə və Xocalı rayonlarını əhatə edir. Yarmarkada vakansiyalara uyğun namizədlərin qeydiyyatı aparılacaq və iştirakçılardan şəxsiyyət vəsiqələrini təqdim etmələri tələb olunur.