Uzun oturmaq xərçəng riskini artırır

Böyük Britaniyada aparılan genişmiqyaslı bir araşdırma, uzun müddət hərəkətsiz oturmağın xərçəngdən ölüm riskini artırdığını göstərib. 91 mindən çox insanın iştirak etdiyi bu tədqiqatda, Qlazqo Universitetinin alimləri UK Biobank məlumatlarından istifadə edərək iştirakçıların fiziki aktivliyini təxminən 12 il ərzində izləyiblər.

Minval.info xəbər verir ki, araşdırmanın nəticələrinə görə, hər əlavə saat ərzində ən azı 30 dəqiqə hərəkətsiz oturmaq xərçəngdən ölüm riskini 9 faiz artırır. Alimlər, uzunmüddətli hərəkətsizliyin qaraciyər, böyrək, mədəaltı vəzi, yoğun bağırsaq, süd vəzi və qalxanabənzər vəzi xərçəngi kimi bir sıra xəstəliklərlə əlaqəli olduğunu müəyyən ediblər.

Mütəxəssislər, gündə bir saat oturma müddətinin yüngül fiziki aktivliklə əvəzlənməsinin xərçəngdən ölüm riskini 12 faiz azalda biləcəyini bildirirlər. Xüsusilə masa arxasında işləyənlərə gün ərzində qısa gəzintilər etməyi və uzun müddət fasiləsiz oturmaqdan çəkinməyi tövsiyə edirlər. Araşdırmanın müşahidə xarakterli olduğu və səbəb-nəticə əlaqəsini tam sübut etmədiyi də vurğulanıb.