Traktorların qeydiyyatında yeni qaydalar tətbiq olunur

Azərbaycanda traktor və digər aqrar texnikaların qeydiyyatı qaydası dəyişdirilib. Kənd Təsərrüfatı Nazirliyinin Kollegiyası tərəfindən qəbul edilən yeni təlimata əsasən, traktorların və meşə, kənd təsərrüfatında istifadə edilən mexaniki nəqliyyat vasitələrinin dövlət qeydiyyatı və uçotu ilə bağlı prosedurlar yenilənib.

Minval.info xəbər verir ki, bu dəyişikliklər çərçivəsində nazir Məcnun Məmmədov tərəfindən imzalanan qərara əsasən, nəqliyyat vasitəsi yetkinlik yaşına çatmamış vərəsənin adına qeydiyyata alınarkən, qeydiyyat sənədində onun valideyninin, övladlığa götürənin və ya himayəçinin məlumatları göstərilməlidir. Belə nəqliyyat vasitələrinin qeydiyyatdan çıxarılması üçün isə müvafiq orqanların icazəsi tələb olunur.

Qeyd edək ki, bu qərar, həmçinin, valideyn himayəsindən məhrum olmuş uşaqların qeydiyyat məsələlərini də əhatə edir və bu hallarda Əmək və Əhalinin Sosial Müdafiəsi Nazirliyinin və ya uşaq hüquqlarının müdafiəsi üzrə komissiyaların qərarları əsas götürüləcək.