Suraxanıda sakinlər təhlükə içində: Evlərə su dolur!

Suraxanı rayonunun Səttar Bəhlulzadə qəsəbəsində yerləşən 18 evin sakinləri təhlükəli şəraitdə yaşadıqlarını bildirirlər. Sakinlər ərazidə qrunt sularının üzə çıxması nəticəsində evlərə su dolmasından, divarlarda çatlar yaranmasından və ciddi nəmişlik əmələ gəlməsindən narazıdırlar. Minval.info xəbər verir ki, onların sözlərinə görə, yağışlı havalarda əraziyə gediş-gəliş çətinləşir. Vətəndaşlar qeyd edirlər ki, bəzi sakinlər evlərini tərk edərək kirayəyə çıxmağa məcbur olublar. Lakin kirayə haqqını ödəməkdə çətinlik çəkirlər. Şikayətçilər ərazidəki qamışlıq səbəbindən həşərat, ilan və digər sürünənlərin də evlərin yaxınlığına gəldiyini deyirlər. Tərk edilmiş bəzi evlərə isə tanımadıqları şəxslərin daxil olaraq gecələdiyini bildirirlər.