Sloveniyada ölü qarğalarda Qərbi Nil virusu tapıldı

Sloveniyanın paytaxtı Lyublyana və Qrosuplye şəhərlərində aparılan araşdırmalar nəticəsində ölü qarğalarda Qərbi Nil virusu aşkar edilib. Minval.info xəbər verir ki, bu barədə ölkənin Qida və Baytarlıq Təhlükəsizliyi İdarəsi məlumat yayıb. Sonuncu dəfə 2024-cü ildə quşlarda bu virusa rast gəlinmişdi. Bu il isə ölkədə insanlarda Qərbi Nil virusuna yoluxma halı qeydə alınmayıb.

Mütəxəssislər bildirirlər ki, qarğalar və digər quşlar virusun təbii rezervuarı rolunu oynayır. Virus əsasən “Culex” cinsindən olan ağcaqanadların dişləməsi ilə insanlara keçir. Hazırda Qərbi Nil virusuna qarşı peyvənd mövcud deyil. İnkubasiya dövrü adətən 2-14 gün davam edir, lakin immun sistemi zəif olan şəxslərdə bu müddət 21 günə qədər uzana bilər. Yoluxanların təxminən 80 faizində heç bir əlamət müşahidə olunmur, digər hallarda isə qızdırma, halsızlıq, ürəkbulanma, qusma, baş və əzələ ağrıları kimi simptomlar ortaya çıxa bilər.