Şəkidə faciə: Ailə AzTV-yə etiraz etdi

Sentyabrın 8-də Şəkidə iki gəncin həyatını itirməsi ilə nəticələnən faciə ilə bağlı yayılan bəzi məlumatlar mərhum Ucal Bayramovun ailəsinin narazılığına səbəb olub. Ucal Bayramovun bacısı Xəyalə Bayramova, AzTV-nin hadisə ilə bağlı hazırladığı süjetə sərt reaksiya göstərib.

Minval.info xəbər verir ki, Xəyalə Bayramova, süjetdə qardaşının və hadisənin təqdimatından narazı olduğunu bildirib və məsələnin hüquqi müstəvidə araşdırılacağını vurğulayıb. O, zərurət yaranacağı təqdirdə, məsələnin Azərbaycan hüdudlarından kənara da çıxarılacağını qeyd edib: “Yasımız var, yazılanlara, deyilənlərə müdaxilə edə bilmirik. Amma lazım olsa, bu məsələ hüquqi müstəvidə Azərbaycan hüdudlarını da aşacaq. Qardaşımın qanı yerdə qalmayacaq. O yalan xəbəri sifariş edənlər də bizim kimi yansınlar…”

Qeyd edək ki, sözügedən süjetdə müxbir hadisəni belə təqdim edib: “Məlum oldu ki, gənclər tros qırılması nəticəsində deyil, güclü külək və bir növ təlaş vəziyyətində olaraq, Ziplaynın rolikləri trosdan çıxaraq, yerə düşüblər”. Süjetdə həmçinin gənclərin kanatdan istifadə etməzdən əvvəl sığorta sənədinə imza atdıqları bildirilib. Bu səbəbdən AzTV bir sıra jurnalistlər tərəfindən ciddi tənqid olunub.