Sabunçuda lift kartları bloklandı: Səbəb borclardır!

Sabunçu rayonunun Bakıxanov qəsəbəsində yerləşən ‘Uğur 2’ yaşayış kompleksinin sakinləri lift kartlarının bloklanmasından narazılıq edirlər. Sakinlər bildirirlər ki, liftlərdən istifadə üçün onlara xüsusi kartlar təqdim olunub, lakin bu kartlar son günlərdə bloklanıb və mənzillərinə qalxa bilmirlər.

Minval.info xəbər verir ki, sakinlərdən biri üç ildir bu binada yaşadığını və kartların işləmədiyini qeyd edib. O, səbəbini soruşduqda aydın məlumat ala bilmədiyini, lakin onlardan pul ödəmək və müqavilə bağlamaq tələb olunduğunu bildirib. Digər sakinlər isə kart sisteminin əsas məqsədinin pul yığmaq olduğunu iddia edirlər. Onlar əlavə kart üçün beş manat tələb edildiyini vurğulayıblar.

‘Uğur 2’ yaşayış kompleksinin xəzinədarı Kəmalə Əliyeva isə məsələyə aydınlıq gətirərək, məhdudiyyətlərin sakinlərin kommunal borclarını ödəməməsi ilə əlaqədar olduğunu bildirib. O, liftdən istifadənin dayandırılmasının səbəbi kimi borcların ödənilməməsini göstərib və kommunal ödənişlərin vaxtında həyata keçirilməsinin vacibliyini qeyd edib.