Səyahət edərkən bu səhvləri etməyin: Əlavə xərclərdən necə qaçmaq olar?

Xarici ölkələrə səyahət edənlərin sayı artdıqca, bəzi turistlərin etdiyi səhvlər əlavə xərclərə və problemlərə səbəb ola bilər. Səyahət planlaşdırarkən bilet və otel seçimindən sənədlərin yoxlanılmasına, sığorta və baqaj məsələlərinə qədər bir çox məqamı nəzərə almaq vacibdir.

Minval.info xəbər verir ki, Azərbaycan Turizm Agentlikləri Assosiasiyasının Turistlərə Maarifləndirmə və Dəstək Komitəsinin sədri Rəhman Quliyev, azərbaycanlı turistlərin ən çox etdiyi səhvlərdən birinin səfəri yalnız qiymət əsasında planlaşdırmaq olduğunu bildirib. Bilet, otel, viza, baqaj və digər şərtlərin tam yoxlanılmaması əlavə xərclərə səbəb ola bilər.

Quliyev qeyd edir ki, turistlər bilet alarkən baqaj limitinə, biletin dəyişdirilməsi və ya qaytarılması şərtlərinə diqqət etmədikləri üçün əlavə xərclərlə üzləşirlər. Sənədlərin düzgün və vaxtında yoxlanılması da vacibdir; pasportun etibarlılıq müddəti, viza tələbləri, tranzit qaydaları və səfər edilən ölkənin giriş şərtləri əvvəlcədən dəqiqləşdirilməlidir. Səyahət sığortası isə gözlənilməz tibbi vəziyyətlərdə, baqajın itməsi və ya səfərin təxirə düşməsi zamanı maliyyə itkisinin qarşısını ala bilər. Otel seçimində isə yalnız ən ucuz təkliflərə üstünlük vermək doğru deyil. Otelin yerləşdiyi ərazi, real rəylər, xidmət şərtləri və bronun ləğv imkanları mütləq nəzərə alınmalıdır.

ƏLAQƏLİ

Bunu da oxu

Pensiya kapitalında yeni dövr: Vətəndaşlara erkən istifadə hüququ gəlir?

13.08.2026 - 22:11

Rəhman Quliyev əlavə edir ki, xüsusilə ilk dəfə xaricə gedən turistlər hava limanında qeydiyyat, transfer, baqaj və tranzit prosedurlarını əvvəlcədən bilmədikdə əlavə stress və vaxt itkisi yaşaya bilərlər. O, turistlərə peşəkar və etibarlı turizm şirkətləri ilə əməkdaşlıq etməyi tövsiyə edir. Bu zaman turistlər yalnız bilet və otel deyil, bütövlükdə təhlükəsiz və rahat səyahət planı əldə edir və səfər zamanı yaranan məsələlərin həllində də peşəkar dəstək alır.