Şəmkirdə maye qazdoldurma məntəqəsinin fəaliyyəti yenidən məhdudlaşdırılıb

Şəmkir rayonunda fəaliyyət göstərən bir maye qazdoldurma məntəqəsinin fəaliyyəti yenidən məhdudlaşdırılıb.

Minval.info xəbər verir ki, Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin əməkdaşları tərəfindən keçirilən yoxlama zamanı, fərdi sahibkar Nəriman Əliyevə məxsus məntəqədə ciddi pozuntular aşkar edilib. Yoxlama zamanı məlum olub ki, daha əvvəl istismarı dayandırılmış 2 ədəd təzyiq altında işləyən tutumla bağlı pozuntular hələ də aradan qaldırılmayıb və qanunsuz şəkildə istismarına davam edilib.

Aşkar olunan pozuntular arasında tutumların istismar müddətinin bitməsi, tam texniki müayinələrin aparılmaması və nəzarət-ölçü cihazlarının yoxlanılmaması yer alır. Bu pozuntuların insan həyatı və sağlamlığı üçün ciddi təhlükə yaratdığı nəzərə alınaraq, tutumların istismarı yenidən dayandırılıb. Eyni zamanda, pozuntuların aradan qaldırılması üçün tərtib edilmiş aktın və Agentliyin müvafiq qərarının surəti sahibkara təqdim edilib.