Rasim Balayevin unudulmaz abidəsi Fəxri xiyabanda

Mərhum Xalq artisti Rasim Balayevin qəbirüstü abidəsinin layihəsi artıq tamamlanıb. Abidənin müəllifi Azərbaycan Dövlət Rəssamlıq Akademiyasının rektoru, Xalq rəssamı Natiq Əliyevdir. Layihə, ənənəvi büst və ya qəbir daşı çərçivəsindən kənara çıxaraq, 4 hissədən ibarət xüsusi kompozisiya şəklində hazırlanıb. Bu kompozisiya, Rasim Balayevin portret obrazı ilə yanaşı, onun böyük ekranda canlandırdığı unudulmaz rolları, sənət yolu və şəxsiyyətinin məziyyətlərini əks etdirir.

Minval.info xəbər verir ki, sənətkarın ailəsi və dostları layihənin Rasim Balayevin şəxsiyyətinə və zəngin yaradıcılığına tam layiq bir əsər olduğunu bildirirlər. Eskizlər həm sənətkarın ailəsi, həm də sənət dostları tərəfindən böyük bəyənmə ilə qarşılanıb. Abidənin hazırlanması fərdi təşəbbüs deyil, rəsmi dövlət sifarişidir. Bu səbəbdən layihənin ümumi konsepti və eskizləri kollegial qaydada müzakirə olunaraq yüksək dairələr tərəfindən təsdiqlənib.

Artıq hazırlıq prosesinin son mərhələsinə qədəm qoyulub və abidənin bu ilin payız aylarında Fəxri xiyabanda ucaldılması planlaşdırılır. Xatırladaq ki, Xalq artisti Rasim Balayev martın 29-da Türkiyədə vəfat edib və I Fəxri xiyabanda dəfn edilib.