Qorxunc gözlənti: Neftin qiyməti 30 dollara düşə bilər

Rusiyanın maliyyə naziri Anton Siluanov neftin qiymətinin kəskin düşmə ehtimalından danışıb. Onun fikrincə, bəzi şərtlər yerinə yetirilməsə, bir barrel üçün qiymət 40 dollardan aşağı düşə bilər. Hətta 30 dollar olması da mümkündür.

Bizimyol.info xəbər verir ki, Siluanov neft ixrac edən ölkələri birləşdirən təşkilatın – OPEK-in üzvlərinin növbəti toplantıda ortaq fikrə gəlməsinin vacibliyini deyib. Nazirin fikrincə, təşkilat üzvləri istehsal həcmini azaltmasa, qiymətlər kəskin aşağı düşəcək.

Hələ mayın 2-də Rusiya enerji naziri ölkənin OPEK razılaşmasına tam əməl etdiyini bildirmişdi. Qonşu dövlət sutkalıq neft istehsalını 228 min barrel azaldıb. Ümumiyyətlə, üzvlər ilin ilk altı ayı üçün ümumilikdə istehsalı 1,2 milyon barrel azaltmağı üzərinə öhdəlik götürüb. Amma qiymətlərin sabit qalması üçün yeni razılaşmaya ehtiyac var.

Rusiya sutkalıq neft istehsalını cəmi 2 faiz azaldır. Burada bir gündə 11 milyon 241 barrel neft çıxarılır.