Qazaxıstanda partlayışın olduğu ərazidə fövqəladə vəziyyət elan olundu

Qazaxıstanın Jambıl vilayətinin rəhbərliyi Bayzak rayonunda fövqəladə vəziyyət elan edib.

Minval.info xəbər verir ki, bu barədə məlumatı vilayətin rəhbəri Berdibek Saparbayev verib.

Məlumata əsasən, avqustun 26-sı Jambıl vilayətində hərbi hissələrin birinin anbarında baş vermiş yanğın və partlayışla əlaqədar olaraq həmin bölgədə fövqəladə vəziyyət elan olunub.

Bununla yanaşı, fövqəladə vəziyyətlə əlaqədar olaraq baş vermiş insidentin nəticələrinin aradan qaldırılması üçün region rəhbərinin müavini Talqat Mamayev bu məsələ üzrə məsul şəxs təyin olunub.

Qeyd edək ki, Jambıl vilayətində hərbi anbarda baş vermiş yanğın və partlayışlar nəticəsində 15 nəfər həlak olub. İnsidentin ardınca ölkənin müdafiə naziri Nurlan Yermekbayev istefa verməyə hazır olduğunu elan etmişdi. Qazaxıstan Prezidenti Kasım-Jomart Tokayev dünən N. Yermekbayevin istefasını qəbul edib və onun əvəzinə bu vəzifəyə Murat Bektanovu təyin edib.