Qazax-Ələt-Bakı yolunda təmir xaosu: Sürücülər narazı

Qazax-Ələt-Bakı magistralının Ələt istiqamətində aparılan təmir işləri sürücülər üçün təhlükəli vəziyyət yaradıb. Təmir zamanı yolun hərəkət hissəsinə nizamsız şəkildə yerləşdirilən konuslar nəqliyyat vasitələrinin hərəkətini çətinləşdirib.

Minval.info xəbər verir ki, sürücülərdən biri bu vəziyyəti “Formula yarışına” bənzədərək, yolda hərəkətin ciddi çətinliklərlə müşayiət olunduğunu bildirib. O, həmçinin asfalt üzərinə yayılan boyanın da təhlükə yaratdığını qeyd edib.

Azərbaycan Yerüstü Nəqliyyat Agentliyindən (AYNA) verilən məlumata görə, prosedura uyğun olaraq, boya çəkildikdən bir saat sonra konuslar yığılır. Lakin iri qabaritli nəqliyyat vasitəsinin zolağını dəyişməsi nəticəsində konuslar dağılıb və boya yayılıb. Qurumdan bildirilib ki, konuslar qısa müddət ərzində yoldan götürülüb.