Portağal qabığı möcüzəsi: Kosta-Rikada qurumuş torpaq yaşıllığa büründü

Kosta-Rikada həyata keçirilən qeyri-adi ekoloji layihə, kənd təsərrüfatı tullantılarının təbiətə faydalı şəkildə qaytarılması məqsədini daşıyırdı və 16 il sonra gözlənilməz nəticələr verdi.

Minval.info xəbər verir ki, bu hadisə 1997-ci ildə Quanakaste Milli Parkında baş verib. Ekoloqlar Daniel Janzen və Vinni Hallvaks, maldarlıq səbəbindən yararsız hala düşmüş torpaq sahəsini yenidən canlandırmaq üçün sitrus meyvələri istehsal edən bir şirkətlə əməkdaşlıq etdilər.

Layihə çərçivəsində meyvə şirəsi zavodundan çıxan təxminən 12 min ton portağal qabığı 3 hektarlıq əraziyə töküldü. Məqsəd, bu qabıqların zamanla çürüyərək torpağı üzvi maddələrlə zənginləşdirməsi idi.

Azərbaycanda qarabağ Milli Parkı yaradılır

ƏLAQƏLİ

Bunu da oxu

Azərbaycanda qarabağ Milli Parkı yaradılır

20.10.2026 - 16:24

16 il sonra tədqiqatçılar əraziyə qayıdanda böyük dəyişikliklə qarşılaşdılar. Vaxtilə quraq və yararsız olan sahə sıx meşəyə çevrilmişdi. Burada iri ağaclar bitmiş, zəngin bitki örtüyü formalaşmış və müxtəlif canlı növləri üçün əlverişli mühit yaranmışdı.

Mütəxəssislər müəyyən etdilər ki, portağal qabığı tökülən ərazidə torpağın qida maddələri və üzvi maddə ilə zənginliyi, qabıq tökülməyən qonşu sahələrlə müqayisədə xeyli artmışdır. Alimlərin sözlərinə görə, portağal qabıqları çürüdükcə torpağın quruluşunu yaxşılaşdırmış, faydalı mikroorqanizmlərin və həşəratların çoxalmasına, yerli bitkilərin sürətlə inkişaf etməsinə şərait yaratmışdır. Eyni zamanda, yaranan qalın üzvi təbəqə zərərli alaq otlarının yayılmasının da qarşısını almışdır.

Mütəxəssislər bildirirlər ki, hər ekosistemdə eyni nəticəni gözləmək olmaz. Bununla belə, Kosta-Rikada aparılan bu təcrübə, üzvi tullantıların düzgün istifadə edildiyi halda təbiətin bərpasına ciddi töhfə verə biləcəyini göstərmişdir.