Ölüm yaşı azalıb - Gənclərin infarkt olma səbəbini həkim açıqladı

Yaxın günlərdə həyatını itirən  39 yaşlı, tanınmış jurnalist Nicat Məlikovun qəfil ürək tutmasından öldüyü barədə məlumat yayılıb.

Bir müddət əvvəl isə  APA TV-nin 41 yaşlı əməkdaşı Natiq Qədimov infarktan dünyasını dəyişmişdi. Elə ürək ağrıdan məqamlardan biri də budur ki, ölümlə nəticələnən ürək tutmaları artıq daha gənc insanlar arasında baş verir.

Minval.info-a ürək-damar sistemi xəstəliklərinin gənclərdə müşahidə edilməsi haqqında danışan tibb elmləri doktoru, professor Adil Qeybullanın sözlərinə görə, ani ölümlə nəticələnən ürək tutmalarının əsasında dayanan amillər müxtəlifdir:

“Azərbaycanda ani ölüm hallarının 60 faizinə ürək-damar sistemi xəstəlikləri səbəb olur.  Bu qəbildən xəstəliklər cavanlaşır, səbəblərdən biri gənclərin həddindən ziyadə  oturaq həyat tərzi sürməsi, yüksək kalorili yeməklərin qida rasionunu təşkil etməsidir.

Bununla yanaşı, Azərbaycana daxil olan ərzaqların keyfiyyət parametrləri də şübhə doğurur, mənşəyi məlum olmayan, keyfiyyətsiz yağlar bəd xassəli xolestrol predmetlərinin yaranmasına təkan verir ki, bu da öz növbəsində damar divarlarının daralmasına gətirib çıxarır”.

Professor A.Qeybulla irsiyyət faktorunu da istisna etmir: “ Valideynlərindən birində şəkər və ya yüksək qan təzyiqi adlandırdığımız “hipertoniya” xəstəliyinin olması da, övladlarda gənc yaşda ürək çatışmazlığının yaranmasına səbəb ola bilər”.

Ürək-damar sistemi xəstəliklərinin qarşısını almaq üçün ailəsində bu cür hallar yaşanan şəxslər erkən yaşlarda, risk faktoru daşımayanlar isə 40 yaşdan sonra ildə bir dəfə kardioloqun müayinəsindən keçməlidir.