MİQ imtahanlarında səhv suallar: Namizədlərə sevindirici xəbər!

Müəllimlərin İşə Qəbulu (MİQ) üzrə imtahanların nəticələri elan edilib. Azərbaycan Respublikasının Təhsil İnstitutu (ARTİ) tərəfindən verilən məlumata görə, imtahanlar başa çatdıqdan sonra sualların məzmunu ilə bağlı daxil olan müraciətlər ekspertlər tərəfindən yenidən nəzərdən keçirilib.

Minval.info xəbər verir ki, bəzi suallarda uyğunsuzluqlar aşkar edilib. Belə ki, biologiya, coğrafiya, rus dili və ədəbiyyatı, kimya və musiqi fənləri üzrə bəzi test tapşırıqlarında səhvlər müəyyən olunub və bu səhvlər namizədlərin xeyrinə düzəldilib.

Yenilənmiş nəticələr artıq namizədlərin şəxsi kabinetlərinə göndərilib və onlar miq.edu.az saytında şəxsi kabinetlərinə daxil olaraq nəticələrlə tanış ola bilərlər. 14-18 iyul tarixlərində keçirilən test imtahanlarında 33 mindən çox namizəd iştirak edib və iştirakçıların davamiyyəti 96 faiz təşkil edib.