Məktəblərin ətrafında təhlükəsizlik tədbirləri gücləndirilir

Yeni tədris ilinin başlanması ərəfəsində məktəblərin ətrafında təhlükəsizlik tədbirləri gücləndirilir. Bakı Şəhər Dövlət Yol Polisi İdarəsi və Azərbaycan Yerüstü Nəqliyyat Agentliyi bu məqsədlə birgə tədbirlər həyata keçirir.

Minval.info xəbər verir ki, paytaxtın küçə və prospektlərində, xüsusilə təhsil müəssisələrinin yerləşdiyi ərazilərdə yol hərəkətinin təhlükəsizliyinin təmin olunması istiqamətində tədbirlər davam etdirilir. Məktəblərin ətrafında nəqliyyat vasitələrinin və piyadaların hərəkət intensivliyinin artacağı nəzərə alınaraq, yol şəraitinə nəzarət gücləndirilir.

Məktəblərin yerləşdiyi ərazilərdə yol hərəkətinin təşkili vəziyyəti diqqətlə araşdırılır, mövcud yol nişanları və nişanlanma xətləri nəzərdən keçirilir, aşkar olunan çatışmazlıqların aradan qaldırılması üçün müvafiq addımlar atılır. Eyni zamanda, məktəblərin qarşısında piyada keçidlərinin, yol nişanlarının və digər texniki vasitələrin vəziyyətinə xüsusi diqqət yetirilir. Məqsəd şagirdlərin məktəbə gediş-gəlişi zamanı onların təhlükəsizliyinin yüksək səviyyədə təmin edilməsidir.