Masazırda qanunsuz tikinti işləri dayandırıldı

Abşeron rayonunun Masazır qəsəbəsində, Rafiq Dünyamalıyev küçəsində yerləşən həyət evlərinin sakinləri ərazidə aparılan çoxmərtəbəli bina tikintilərindən narahatdırlar. Sakinlər, tikinti ilə öz evləri arasındakı məsafənin cəmi iki-üç metr olduğunu bildirərək, bu vəziyyətin evlərinin təhlükəsizliyini təhdid etdiyini və ətraf mühitin toz-torpaqla çirkləndiyini qeyd edirlər.

Minval.info xəbər verir ki, Abşeron Rayon İcra Hakimiyyəti tərəfindən ərazidə aparılan monitorinq zamanı, Rafiq Dünyamalıyev küçəsi, 14 ünvanında vətəndaş Həsənov Rəşad Rasim oğlunun müvafiq icazə sənədləri olmadan bünövrə tikintisi işləri apardığı aşkar edilib. Bu səbəbdən, icra hakimiyyəti tikinti işlərini dayandırıb və vətəndaşa xəbərdarlıq edib. Qanunsuz tikinti ilə bağlı tədbirlər görülməsi üçün məlumat aidiyyəti qurumlara göndərilib.