Maaşlar niyə qiymət artımına çatmır? – Ekspertlərdən diqqətçəkən təkliflər

Azərbaycanda son dövrlərdə maaşların artmasına baxmayaraq, ərzaq və gündəlik tələbat məhsullarının qiymətlərinin yüksəlməsi vətəndaşların real gəlirlərinə mənfi təsir edir.

Minval.info xəbər verir ki, iqtisadçı-ekspert Akif Nəsirli bu məsələnin səbəblərini və həll yollarını açıqlayıb. Onun sözlərinə görə, maaşların artması ilə qiymətlərin yüksəlməsi eyni məna daşımır. Əməkhaqqı nominal gəliri göstərsə də, insanların real vəziyyətini müəyyən edən əsas göstərici həmin maaşla nə qədər məhsul və xidmət ala bilmələridir.

Akif Nəsirli qeyd edir ki, maaşların qiymət artımından geri qalmasının əsas səbəblərindən biri məhsuldarlığın və iqtisadi gəlirlərin əməkhaqqı artımı ilə eyni sürətlə yüksəlməməsidir. Müəssisənin istehsalı və gəliri ciddi şəkildə artmırsa, əməkhaqqının sürətlə artırılması onun xərclərini yüksəldir və bu xərcin bir hissəsi məhsul və xidmətlərin qiymətinə keçir.

ƏLAQƏLİ

Bunu da oxu

Yeni klinikada dəyişiklik: Jalə bədirova ilə ictimaiyyətlə əlaqələrdə yeni era

12.08.2026 - 17:56

Ekspert, həmçinin, Azərbaycanda bəzi ərzaq məhsulları və xammalın idxaldan asılılığının qiymət artımına təsir etdiyini vurğulayır. Dünya bazarında qiymətlərin, daşınma və logistika xərclərinin yüksəlməsi daxili bazarda da bahalaşmaya səbəb olur.

Akif Nəsirli ərzaq qiymətlərinin sabitləşdirilməsi üçün yerli istehsalın artırılmasını, fermerlərin istehsal xərclərinin azaldılmasını və suvarma, logistika imkanlarının yaxşılaşdırılmasını təklif edir. O, həmçinin sosial baxımdan minimum əməkhaqqı, pensiya və sosial ödənişlərin inflyasiyaya uyğun indeksləşdirilməsinin əhalinin alıcılıq qabiliyyətinin qorunmasına kömək edəcəyini bildirir.