Mərkəzi asiyada 4 ölkəni qaraldan qəza: Elektrik enerjisi niyə kəsildi?

Mərkəzi Asiyanın dörd ölkəsində, yəni Qazaxıstan, Qırğızıstan, Tacikistan və Özbəkistanda elektrik enerjisinin verilişində eyni vaxtda fasilələr baş verib.

Minval.info xəbər verir ki, bu kəsintilər təxminən eyni zamanda qeydə alınıb və hadisənin səbəbi qonşu ölkələrdən birindəki elektrik şəbəkəsində baş verən qəza ilə əlaqələndirilir. Özbəkistanın Energetika Nazirliyi, bu qəzanın Mərkəzi Asiyanın vahid enerji sisteminə təsir etdiyini bildirib. Nəticədə, Surxandərya vilayətinin bəzi bölgələrində elektrik enerjisi dayandırılıb. Lakin qəzanın konkret hansı ölkədə baş verdiyi hələ açıqlanmayıb.

Qazaxıstanda isə 500 kilovoltluq üç elektrik xəttində yaranan fasilə səbəbindən Almatı vilayətinin bəzi rayonları işıqsız qalıb. Tacikistanın paytaxtı Düşənbə və digər şəhərlərində də elektrik kəsintiləri müşahidə olunub. Eyni vəziyyət Qırğızıstanın paytaxtı Bişkekin bəzi ərazilərində də yaşanıb.