Küçə ticarətinə qarşı reydlər: Çözüm nədir?

Küçə ticarətinin qarşısının alınması məqsədilə həyata keçirilən reydlərə baxmayaraq, bu sahədə problemlər hələ də davam edir. Ekspertlər hesab edirlər ki, küçə ticarətini tamamilə aradan qaldırmaq əvəzinə, onu qanuni və nəzarət olunan formada tənzimləmək daha məqsədəuyğundur.

Minval.info xəbər verir ki, Azərbaycan Qiymətləndiricilər Cəmiyyətinin sədri Vüqar Oruc bu mövzuda açıqlama verərək bildirib ki, reydlərin keçirilməsi ilə küçə ticarətini tamamilə sıradan çıxarmaq heç bir ölkədə mümkün olmayıb. O qeyd edib ki, dünyanın iri şəhərlərində küçə ticarəti insanların toplaşdığı yerlərdə mövcuddur və bu ticarətin tənzimlənməsi üçün reydlərin və monitorinqlərin daha sıx keçirilməsi, cərimələrin artırılması ilə yanaşı, preventiv tədbirlərin də görülməsi zəruridir.

Beynəlxalq təcrübədə müəyyən ərazilərin küçə ticarəti ilə məşğul olan şəxslər üçün ayrılması praktikası mövcuddur. Bu zaman vətəndaşlar həmin ərazilərdə küçə ticarəti ilə məşğul olan insanların təklif etdiyi məhsulları alırlar. Lakin nəqliyyat əhəmiyyəti olan yerlərdə küçə ticarətinin olmaması həm turizmin inkişafı, həm də qeyri-rəsmi ticarət fəaliyyətinin aradan qaldırılması baxımından vacibdir. Müəyyən olunmuş ərazilərdə küçə ticarətinin nizamlı qaydada aparılması onların vergiyə cəlb olunmasına və daha aşağı ödəniş etməklə satışlarını həyata keçirməsinə imkan yaradır.