Koronavirus xəstələrinin olduğu xəstəxanada partlayış olub? - AÇIQLAMA

Fövqəladə Hallar Nazirliyinin Zığ qəsəbəsi ərazisində yerləşən modul tipli xəstəxanasında qəza baş verib.

“MediaPost”un əldə etdiyi məlumata görə, ötən gün 21:00 radələrində oksigen stansiyasında partlayış qeydə alınıb. Hadisə nəticəsində bir neçə korpusda yerləşdirilən koronavirus xəstələrinin oksigen qəbul etməsində problem yaranıb.

Saytımıza daxil olan bir neçə mənbənin məlumatına görə, xəstəxanada xeyli insan həyatını itirib. Ölüm hadisəsinin ən çox 16-cı korpusda qeydə alındığı bildirilir. Hadisədən qismən zərər görən şəxslər isə Saray qəsəbəsində yerləşən modul tipli xəstəxanaya köçürülüb.

Həmçinin üç gün əvvəl xəstələrə oksigen verilməsində problemin yarandığı söylənilir:

“Əvvəldən bilinirdi ki, nəsə problem var. Bir neçə həkim xəstəni güclə özünə gətirdi”, – deyə mənbə bildirib.

TƏBİB-in İctimaiyyətlə əlaqələr şöbəsinin məsləhətçisi Elnarə Baxış bu barədə suallara cavab verməyib:

“O xəstəxana bizim tabeliyimizdə deyil. Fövqəladə Hallar Nazirliyi ilə əlaqə saxlayın”.

FHN-nin mətbuat katibi Gülçin Mehdiyeva “MediaPost”a açıqlamasında iddiaları təkzib edib:

“Orada heç bir hadisə baş verməyib”.

Qeyd edək ki, yay aylarında istifadəyə verilən xəstəxanada rəsmi məlumata görə, 4 ədəd oksigen stansiyası var.