Koroğlu stansiyası yaxınlığında qanunsuz parklanma: Kimlər bu işin başındadır?

Metronun “Koroğlu” stansiyası yaxınlığında yerləşən boş bir ərazinin qanunsuz parklanma məntəqəsinə çevrildiyi iddia edilir. Ziya Bünyadov prospektindən Koroğlu istiqamətində bu ərazinin bir şəxs tərəfindən zəbt edilərək avtomobillərin saxlanması üçün istifadə olunduğu bildirilir.

Minval.info xəbər verir ki, Baku TV-nin qaynar xəttinə müraciət edən vətəndaşın məlumatına əsasən, ərazi zəncirlə bağlanıb və burada parklanma xidməti göstərilir. Araşdırma zamanı ərazidə çalışan şəxslə söhbət aparılıb və o, Elvin adlı şəxsin tapşırığı ilə işlədiyini, toplanan vəsaitdən ona gündəlik ödəniş etdiyini bildirib. Ərazinin sahibi olduğu iddia edilən şəxs isə avtomobillərdən ödəniş alınmadığını, yalnız nəzarət edildiyini deyib.

Azərbaycan Yerüstü Nəqliyyat Agentliyindən (AYNA) verilən məlumata görə, bu ərazidə agentlik tərəfindən hər hansı parklanma təşkil olunmayıb və belə bir fəaliyyət üçün icazə verilməyib.