İşğaldan azad ərazilərə 17 milyonluq vergi güzəşti

Azərbaycanın işğaldan azad edilmiş ərazilərində fəaliyyət göstərən müəssisələr, o cümlədən sənaye parkları, idxal olunan texnika, texnoloji avadanlıqlar və xammallar üçün 17,4 milyon manat dəyərində vergi və gömrük rüsumlarından azadolma əldə ediblər.

Minval.info xəbər verir ki, bu ərazilərdə investisiya mühitinin yaxşılaşdırılması və sahibkarlığın inkişafı məqsədilə müxtəlif dəstək mexanizmləri tətbiq olunur. Qarabağ və Şərqi Zəngəzur iqtisadi rayonlarında vergi uçotuna alınan və bilavasitə həmin ərazilərdə fəaliyyət göstərən hüquqi və fiziki şəxslər 2033-cü il 1 yanvar tarixinədək müvafiq iqtisadi fəaliyyət sahələri üzrə texnika, texnoloji avadanlıq və qurğuların, habelə xammal və materialların idxalı zamanı əlavə dəyər vergisindən (ƏDV) və gömrük rüsumundan azaddırlar.

Bu güzəştlər çərçivəsində bölgədə tekstil, tikinti materialları, elektrik avadanlıqları, nəqliyyat vasitələri və digər sənaye məmulatlarının istehsalı həyata keçirilir. Güzəştlərdən yararlanmaq üçün sənədlər fiziki və elektron formada qəbul edilir. İdxalı nəzərdə tutulan texnika və avadanlıqların siyahısı Nazirlər Kabinetinin 2023-cü il 5 avqust tarixli qərarı ilə təsdiq edilib.