Hümmət Əliyev maliyyə cinayətində ittiham olunur

Rusiya Teatr Sənəti İnstitutunun (GİTİS) keçmiş prorektoru Hümmət Əliyev haqqında yeni iddialar ortaya çıxıb. İddialara görə, GİTİS-in rektoru Sergey İsayevin qətlindən sonra institutun Moskvanın Vorontsov parkı yaxınlığında yerləşən Tədris Teatrı və digər tikililər Hümmət Əliyevə verilib.

Minval.info xəbər verir ki, bu işdə Moskva hökuməti sədrinin müavini Vladimir Slepakın Hümmət Əliyevə dəstək göstərdiyi iddia edilir. Hümmət Əliyevlə birlikdə onun oğlu Emil Əliyev, Eldar Mirvət oğlu Əliyev, Maksim Sərdarov və Viktor Lutsenko adlı şəxslərin də maliyyə cinayətində şübhəli bilindikləri bildirilir.

Hümmət Əliyev Azərbaycanda doğulub və əmək fəaliyyətinin ilk illəri Bakı ilə bağlı olub. 1972-ci ildə Bakı Xoreoqrafiya Məktəbini bitirib, daha sonra Azərbaycan Dövlət Opera və Balet Teatrında çıxış edib. Bakıda Xoreoqrafiya Məktəbində müəllim işləyib və 1990-cı ildə Moskvaya köçüb. O, GİTİS-in baletmeyster fakültəsində təhsil alıb və 1994-cü ildə prorektor vəzifəsinə təyin olunub. Hümmət Əliyev həm inzibati-təsərrüfat işləri, həm də klassik rəqs və hüququn əsaslarından dərs deyib.