Güzəştli mənzillərin rəqəmsal satışı uğurla tamamlandı

Bu gün Mənzil İnşaatı Dövlət Agentliyinin həyata keçirdiyi layihələr çərçivəsində Lənkəran, Şirvan və Yevlax Yaşayış Komplekslərində yerləşən 535 mənzil “Güzəştli mənzil” sistemi vasitəsilə uğurla satılıb. Satış prosesinin tam təhlükəsiz və fasiləsiz şəkildə həyata keçirilməsi dövlət qurumlarının sıx əməkdaşlığı nəticəsində mümkün olub.

Minval.info xəbər verir ki, Rəqəmsal İnkişaf və Nəqliyyat Nazirliyi, Dövlət Təhlükəsizliyi Xidməti, Xüsusi Rabitə və İnformasiya Təhlükəsizliyi Dövlət Xidməti və Mənzil İnşaatı Dövlət Agentliyinin mütəxəssisləri bu prosesdə birgə fəaliyyət göstəriblər. Bu əməkdaşlıq nəticəsində satışın bərabər şəraitdə və təhlükəsiz şəkildə həyata keçirilməsi təmin edilib.

Məlumatda qeyd olunur ki, Azərbaycan elektron məkanda vətəndaşlara yönəlmiş keyfiyyətli və etibarlı xidmətlərin təqdim olunması sahəsində qabaqcıl ölkələrdən biridir. Mənzil İnşaatı Dövlət Agentliyi gələcəkdə də satış prosesinin təkmilləşdirilməsi və şəffaflığın artırılması istiqamətində yeniliklər tətbiq etməyi planlaşdırır. Ölkəmizdə rəqəmsal xidmətlərin təhlükəsizliyinin yüksək səviyyədə təmin olunması davam etdiriləcək.