Göygöldə avtobus problemi: Sakinlər hər gün taksiyə pul xərcləmək məcburiyyətindədirlər

Göygöl rayonunun Yeni Qızılca kəndində yaşayan sakinlər, ictimai nəqliyyatın fəaliyyəti ilə bağlı ciddi narahatlıq keçirirlər. Onlar, kəndə xidmət edən avtobus marşrutlarının axşam saat 18:00-da fəaliyyətini dayandırmasından şikayətçidirlər. Bu vəziyyət, işə və təhsil müəssisələrinə gedib-gələn sakinlər üçün böyük çətinliklər yaradır.

Minval.info xəbər verir ki, sakinlər yalnız marşrutların erkən dayanmasından deyil, həm də avtobusların köhnə və istismar müddətini başa vurmuş vəziyyətdə olmasından narazıdırlar. Onlar, 7 nömrəli marşrut xəttinin təxminən 2 kilometr uzadılaraq Yeni Qızılca kəndinədək fəaliyyət göstərməsini tələb edirlər.

Kənd sakinlərindən biri, mövcud vəziyyətin xüsusilə məktəblilər və tələbələr üçün əlavə çətinlik yaratdığını bildirir. “Gəncə şəhərinə məktəbə və universitetə gedən uşaqlarımız var. Axşam saat 19:00-da avtobusdan düşəndə onları qarşılamaq üçün mütləq dayanacağa getməli oluruq. Yaxşı olardı ki, marşrut kəndimizin içərisindəki dayanacağa qədər işləsin. İnsanlar taksidən istifadə etməyə məcbur qalırlar. Hamının gəliri elə deyil ki, hər gün taksiyə pul xərcləsin”, – deyə sakinlərdən biri qeyd edir.